«aiuntados en el campo
de Estibaus segun que lo havemos de uso de costumbre de nos juntar...» (Altza, 1390)

Antxon Alfaro

Gaurko egunean, duela 53 urte, 1967ko abenduaren 24an, Los Boscos auzuneko etxebizitza berrien giltzak eman ziren.

Eguna meza komunitario batekin hasi zen, eta, ondoren, giltzak eman zitzaizkien bizilagun berriei, etxebizitza-kooperatiba berriaren lokal sozialean. Gaur egun, gune horretan Boskotarrak Elkartea dago.

Giltzak agintari zibil eta erlijiosoek eman zituzten, Ernesto Martinezek Super-8 kamera batekin grabatutako filmean ikus daitekeen bezala. Irudi horiek digitalizatu ondoren, Altzako Tokiko Bilduman sartu ditugu.

60ko hamarkadan, Santa Barbara eta Roteta auzuneak eraiki ondoren, Harri aldean jarraitu zen auzune berriak eraikitzen: Los Boscos, Arrizar eta Arriberri.

Hala ere, nahiz eta denboran bat etorri, auzune horien garapen urbanistikoa eta soziologikoa ez zen berdina izan. Los Boscos auzuneak ezaugarri bereziak izan zituen, bai sorreran baita garapenean ere.

Garai haiek ezagutu zituzten pertsonen testigantzak jasoz (Jose Ramon Sesé, Antonio Sampietro, Juan Carlos Larequi, Pedro Miguel Ezkerra…), bai eta dokumentu, film eta argazkiak ere, Altzako auzune honen sorrera, eraikuntza eta garapena aletuko ditugu Estibauseko sarrera desberdinen bidez.