Udal Hauteskundeak: ALTZAKOAK-Altzako hauteskunde ekimen independentea
Antxon Alfaro
1999ko udal hauteskundeetan, altzatar talde batek hautagaitza aurkeztu zuen Donostiako Udalerako eta Gipuzkoako Batzar Nagusietarako. Ekimena sustatzaileen arabera sortu zen, “Donostiako Udalak ahaztutako eta baztertutako komunitate batean bizi garelako sentimenduan oinarrituta”.
Justo Garatek gogoratzen duenez, ideia Elkartasuna auzo elkartearen lokalean (Santa Barbara) egindako bilera batean mamitu zen. Bilera horretan izan ziren, besteak beste, Albaro Fernandez, Jose Mari Bidegain, Justo Garate…
Alderdi berriari ALTZAKOAK- Altzako hauteskunde ekimen independentea deitu zioten. 1999ko apirilaren 28an, Albaro Fernandezek eta Dani Garciandiak Madrilgo Alderdi Politikoen Erregistroan inskribatu zuten. Presidente bezala Justo Garate zegoen, presidenteordea Fernando Zamorano zen, diruzaina Jose Maria Bidegain eta idazkaria Albaro Fernandez.
Erregistratu ondoren, Berdeak-Los Verdes taldearekin elkartu ziren. Juantxo Domínguez zen talde honetako arduradunetako bat. 1999ko udal hauteskundeetan aurkeztu zuten hautagaitzak Coalicion Hiritarron Elkartasuna (Berdeak-Los Verdes/Altzakoak) izena hartu zuen. Justo Garate Irure izan zen Donostiako udalerako hautagaitzaren zerrendaburua eta Arturo Justo Tovar Gipuzkoako Batzar Nagusietarako.
Donostiako Udalerako bozketetan 401 boto (% 1,84) lortu zituzten 7. hautesbarrutian, Altzako udalerri zaharrari dagokiona. Donostia osoan 677 boto lortu zituzten.
Hauteskunde horietan bakarrik aurkeztu ziren.
