Ba dator
Unai Elizasu
Doinua: “Bazkalosteko kafea”
Orreagatik datorrela bat
Ta bestea Suediatik,
Ta biak pasa asmotan daude
Gure herritik, Altzatik;
Bat korrika da bestea IKEA,
Zer dute ba antzekotik?
Euskara eta altzairu pila
Ezberdin dira, zergatik?
Bata etorri ta joango da
Baina bestea ez dakit?
Batekin igual tristetzen gera
Ta besteakin alaitu,
IKEA jasan egin behar da
Ta euskara berriz aitu,
Baten bidea berdin zait baina
Bestena ez bedi amaitu,
Euskerak eta IKEAk igual,
Eginkizun bera baitu,
Batak etxea jazten du eta
Besteak gu jazten gaitu.
Auditz aldeko proiektuari
Begiratzen ipinia,
IKEAk eta euskerak dute
Gauza pila eskeinia,
Etxe denentzat proposamena
Jartzea`re komenia,
Proiektuak du bai altzari ta
Bai euskararen premia,
Batak azala jantzi dezala,
Eta besteak mamia.
